2023年02月9日

港股前日借國內事件一下插到位完成調整回升,都只係望佢期指結算前後可以矮仔上樓梯,今個星期慢慢收復10天線之上,結果一日就同你爆佢上去,前日20天線升穿50天線的威力都幾大,升市中指數仲要全日貼近高位行,成交增至1,667億元。恒指升到上18200,大升900點,更拋離10天線450點。低位買到貨嘅,指數唔掉頭穿10天線,就繼續揸上去,上面睇,100天線落到18450,啱啱到月中高位18400,儲夠動力一囗氣可破晒,下個位已去到19200。

升市催化劑係一眾科技股、內房、內銀、內險,同疫情股。前晚中證監再出招,推出幾項措施,淮許上市房企併購重組,再融資,內房板塊再炒起,龍湖(960)升11%,中海(688)同潤置(1109)升7%。內房看似有得救,都帶起內銀同內險,起碼有機會唔使做撥備。阿爺噚日就近期發生事件,召開疫情記者會,市場憧憬有好消息,消息多籮籮,甚至有指話確診者自家隔離,不封區,當然暫時唔會,太大變動同國家政策相違背,係需要時間,唯一見到係話快封快解,不過疫情解封股就唔理一齊炒。同上一個浪一樣,大股先行,跟住會炒個別板塊,醫藥股早過大市上升,已休息咗一輪,隨時一有政策就再炒。

滙豐控股(005)公布,同意以現金代價135億加元(787.8億港元)出售加拿大業務予加拿大皇家銀行。此交易預計可為集團帶來除稅前利潤約57億美元,而集團的普通股權一級比率將較現行資本計劃高出約130個基點。

美股盤中回落200點,市場觀望今晚鮑威爾講話,加上消費信心指數跌至4個月低位,股市反覆偏軟,納指跌0.6%。中概股指數升5%,當然部份係追回噚日中港股市升幅。

美匯回升上106.8,日圓138.8,歐元1.033,人民幣強番,美元兌人民幣回落至7.145。