2023年02月9日

星期日晚上同噚日早上,好多社交媒體都大肆報導國內疫情同各地發生嘅示威事件,加上降準只得25點子,疫情發展到依家已經有三年,全世界大部份地方已接受同病毒共存,國內市民望住世界,見到國內疫情數字高企,面對封區,抑壓住嘅情緒難免爆發,問題係國家有咩辦法淡化人民情緒,再制定重開政策。

中港股市嚇咗一嚇,裂囗下跌下再插一插,曾跌穿50天線同0.382嘅黃金比率16955,低見16833,一下子就跌到預設嘅入貨位,低位徘徊不足一小時,應該未反應得到就隨上證反彈,收市17297,上番兩個重要位上面,只跌275點,低位計彈咗近500點,叫做暫時頂得住,噚日北水都轉淨入66億元,反映近17000水平國內資金入市意欲又強番。今日期指結算,聽日場外結算,盡快上得番去回補噚日裂囗仲有得搏調整完成,若果跌穿16800就點都要避一避。

騰訊(700)同蔚來(9866)簽署合作協議,雙方將會喺智能駕駛地圖、自動駕駛雲、數字生態社區等領域展開深度合作。

藍籌之一嘅阿里健康(241)截至9月底止中期盈利1.62億元人民幣,去年同期虧損2.32億元,每股盈利1.19仙,不派中期息。

中國電商拼多多第三季度經調整盈利124.5億元人民幣,按年增長295%,實現營收355億元,按年增長65%,雖然公司表明增長未必具可持續性,但客戶數據增長良好,股價ADR升13%。

受國內疫情影響,和高盛調升美國經濟出現衰退機率,美股借勢回落,三大指數跌1.5%,有國內生產線企業嘅股價較弱,蘋果要跌近3%,Meta因為洩漏用戶數據要被歐盟罰款。反而中概股指數回升接近3%,帶動外圍恒指上升逾200點。

美匯106.21,人民幣低位徘徊,報7.23,英鎊1.2。美10年債息3.71厘。