2023年02月9日

港股上個禮拜成個星期幾百點內橫行,國內疫情數字繼續上升,噚日公佈已接近40000宗,加上又有世界盃,成交都減少咗,騰訊(700)嘅南非股東喺企鵝業績期後又出嚟話會繼續減持,幾樣不利因素個市都落唔到去50天線或者0.382個位(16955),全因又有內銀、內險同內房頂住,其實上星期四收市後已經有人講話周末有機會降存準。阿爺做嘢要等時機,早前美金升嗰時,人民幣已經不濟,再減息人仔會散,終於等到美匯跌,而近一周銀行已開始放水救內房,內銀要用錢,唔降存準,錢從何來。結果收市後即降存準25點子,而唔係部份人預期嘅50點子,夜期同黑期都冇乜大刺激,最驚市場解讀阿爺做嘅係得咁多。

美團(3690)第三季業績虧轉盈,股東應佔盈利12.16億元人民幣,去年同期虧損99.95億元。經調整盈利35.27億元,上年同期虧損55.27億元;期內基本業務同新經濟業務收入都有增長。

人民銀行已準備使用向國內金融機構提供嘅再貸款資金,購買房地產開發商新發行嘅債券,相關再貸款安排將在未來幾周內實施。為房企(主要是民營房企)新發行嘅境內債券提供流動性。若投資者對房企新發行債券冇足夠嘅需求,人行再貸款資金可能會介入,認購剩餘債券份額,將標誌着中國政府對房地產業最有力嘅政策支持。

澳門政府公佈現有6間博彩企業全獲續牌10年。

荷蘭貿易部長稱正同美國談判對中國晶片設備出囗嘅新限制,因為限制已影響到荷企利益。

美國聯邦通訊委員會宣佈基於國家安全理由,禁止中興(763)同華為嘅電訊設備產品在美國銷售。

美國上周 Black Friday 傳統購物日,氣氛未如理想,美股半日市下道指仍升152點,納指跌58點,而中概股指數則下跌3.2%。富士康員工抗爭事件可能令蘋果iPhone 產量減少30%,蘋果股價跌2%。

中國新冠疫情可能導致國內原油需求減少,紐約期油上周五收市下跌至76.3美元。

美債息企喺3.7厘,美匯106.06,英鎊已上番1.2,歐元1.04,人民幣降準下進一步下跌至7.194。