2022年11月30日

港股昨開市衝一衝,10分鐘做了全日個頂17759,10天線前頂住,剛剛好升一升穿17750就回,全日波幅200幾點,恒指矮仔上樓梯,成交800幾億下升137點。市喺度等,等乜唔知,可能等阿爺再有新政策。噚日國內疫情逾30,000宗,今次國家疫情爆發中港股市未有大回,係消費股要跌,市傳今日上海廸士尼會重開,相信換轉上一次會冇咁快開得,阿爺手段明顯放鬆咗,所以如果冇今次疫情,中港股市可能升咗上去。仲有20天線已經去到16800,如果市況冇逆轉穿落去,下星期二、三就會上穿50天線,希望為個市再增動力。

中國恒大(3333)境外債務重組方案計劃最快喺12月份第一周同境外債權人溝通,兌現公司之前話今年底前提出重組計劃嘅承諾。而債權人特設小組要求恒大董事局主席許家印個人向恒大出資至少20億美元,作為接受公司債務重組方案嘅條件。

美股感恩節噚晚假期休市一天,匯市都較靜,美匯105.75,歐元升上1.04,日圓138.6,人民幣進一步下跌至7.175。紐約期油78美元。