港股冇承接到外圍反彈，但亦都能止跌，平開後冇跌穿前日低位17287，中段開始回升，穩得住個跌勢，問題係力度差啲，今個調整浪喺高位計約跌了1100點，可以叫足夠，亦都守得住由14579拉上嚟嘅上升支持，噚日調整中成交縮到963億元。恒指今個星期開17750，上得番去令周線開陽燭，就有機會完成調整。

其實噚日見大型科技股都有盤主動掃貨，螞蟻傳會被罰錢，係就好，快手搞掂可重新上市，雖然集資額會少一大截，但對巴巴（9988）係一件好事，有機會雨過天晴，噚日升3%。巴巴同京東（9618）一樣，只係輕輕穿過十天線就即刻收復，個勢暫時仲喺度。騰訊（700）呢個浪係咁多隻最強，十天線冇穿過，最弱當然係美團，喺所有平均線下，而騰訊嘅南非大股東都表明收到美團股份後會沽售，噚日都要逆市微跌。

小米集團（1810）公布 第三季股東應佔虧損14.76億元，去年同期股東應佔盈利7.92億元，每股基本虧損0.06元。而按非國際財務報告準則的經調整淨利潤21.17億元人民幣，按年跌59.09%。

聯儲局公佈上月議息紀錄，多數官員認同可放緩加息步伐，利率期貨顯示12月加50點子機率高達80%。美股上升95點，納指升1%，中概股企穩。連日下跌的Tesla獲摩通調升目標價，終出現反彈。

紐約期油再穿80美元，最新78美元，美債息回3.7厘，美匯急回到106，英鎊重上1.2，歐元1.04，而人民幣為7.15，唔係彈好多。

外圍恒指升上17700水平，睇下今明兩日穿唔穿到17750。