2022年11月30日

外圍股市唔行,係科技股弱啲,港股出咗回吐就承勢再落,上證由升轉跌。拖累港股下午跌幅擴大,10天線噚日上到17502,終於跌穿咗,如果唔係幾隻藍燈籠頂住,指數可能只得17200。早前升市係有利好消息配合,近幾日都再冇其他政策接力,指數冇力再上,況且下星期二已經係期指結算,大户轉倉都需要有一定嘅波幅。恒指同前日一樣,急跌後尾市抽一抽,收17496,成交1,200億元,北水淨沽58億元,同噚日一樣,下面都係睇住16955至17100呢個最後防線區間,向上搏轉勢,升穿17750先再講。

美團(3690)3日後公佈業績,噚日好似有壞消息咁,埋單跌8%,騰訊派貨都要明年3月。國內疫情持續,一眾消費股連續第二日下跌,李寧(2331)就跌咗5%,內房物管板塊高開後又跌落去,可能驚疫情再影響銷情。

國家當局正在考慮對螞蟻集團處以逾10億美元(逾78億港元)嘅罰款,罰款理由可能係螞蟻集團涉嫌資本無序擴張嘅違規行為,若屬實有機會繼滴滴出行後第二大罰款數字。

股神畢非德嘅投資旗艦巴郡,11月17日再喺場內出售比亞迪(1211)322.55萬股H股,每股平均作價約195.4212元,套現約6.3億元。

快手(1024)公布至今年9月底止,第三季股東應佔虧損27.13億元人民幣,每股虧損0.64元,去年同期虧損70.86億元。經調整虧損淨額6.72億元,去年同期經調整虧損淨額46.16億元。

美股喺感恩節假期前三大指數一同上升1.3%,連較弱嘅納指都跟到,高盛估計美企下年盈利樂觀情況下都係零增長,而摩通則預期下年有機會減息。

美匯反彈一日後回落到107.07,其他貨幣變動不大,歐元1.03,人民幣7.14。紐約期油回升上81美元。