2022年11月30日

國內疫情漸趨嚴重,北京石家莊同廣州白雲區開始出現封城,此舉對市場憧憬中國會開關無疑係一個小小嘅打擊,而中港股市亦都借勢調整一下,上證腰力較好,曾跌40點,收市只跌12點,而港股就差少少,最低隊到17389,都有得彈下,收17655,成交1,100億元。封城首當其衝就係一眾消費飲食股,海底撈(6862)最多跌逾一成,最後都要跌7%,體育用品股跌幅冇咁大,跌2至4%。大股中騰訊(700)只跌1.6%,係隻美團(3690)同京東(9618)最弱,一開已跌超過4%,埋單跌5%;後者盤數夠靚,可能係業績後有獲利盤,麥覺理都讚京東季績靚,睇357元。

至於恒指,10天線去到17423,昨日穿一穿就挾上去,亦都上番昨日提過的17500後抽第一個支持位,向下第一個裂囗差不多完全回補,第二個裂囗只係日線圖出現,周線係冇嘅,周線反映中期走勢,若真係升市回補機會不大。事實恒指係出現緊回吐,10天線已經係50天線上,20天線都上緊嚟,走勢上未顯示個市升完,調整幾多冇得估,除非50天線都失守就要小心,黃金比率計,調整0.382,要去到16955,同50天線17117只差160點,呢兩個位可以做指標。

京東健康(6618)至9月底止第三季經營盈利7,722.5萬元人民幣,去年同期虧損5.56億元。

中國疫情封城令油價繼續回落,曾跌5%至76美元,最新為79美元。美匯反彈,上番107.8,日圓142,英鎊1.18,人民幣7.17。

美股走軟,道指跌45點,納指仍然弱,跌121點,有中國業務股份表現較差。比特幣跌穿16,000美元,虛擬貨幣市場正處寒冬,連環爆煲後出現了信心危機,交易平台coinbase都跌了9%。