2022年11月30日

港股上周五承外圍中概股上升下高開,又係去到18400就掉頭,一個星期內三次18400都回落,短期阻力已經好明顯,但係又跌唔手落住,10天線上到17310,個市如果出後抽,第一個支持應該會喺17500左右,如果個市再橫行多幾日,等10天線上去,仲可以抽多一下,上試100天線18800水平。

恒指會於12月5日後加入康師傅(322),華潤萬象(1209)同海爾智家(6690)三隻成份股。

京東集團(9618)至9月底止第三季業績,按非公認會計準則,股東應佔盈利100.4億元人民幣,按年增長98.9%,每股盈利3.21元。同系嘅京東物流(2618)虧損收窄至2.87億元人民幣,非公認會計準則盈利為2.54億元,去年同期為虧損10.7億和6.2億元。

外圍股市反覆,環球股市基金仍有資金流入,道指升200點,納指就彈力一般,Tesla繼續軟,中概股指數跟住上周五香港科技股高開低收下跌近3%。年底前大家都係留意假期消費數據,聯儲局官員囗吻,睇下12月能否只加半厘。

美匯回升上107,英鎊1.19,日圓140,人民幣7.126。中國疫情升溫,市場擔心石油會出現供過於求,紐約期油一度急跌5%,收市重上80美元。