2022年11月30日

噚日港股借勢回調,其實壞消息係冇乜,衝唔上就落去打番個底再做過仲好。騰訊(700)派佢持有9成美團(3690)作中期股息,後者一開就跌6%,呢幾日最多就跌13蚊,帶住個市落,而恒指最多跌近500點,下面第一個裂囗都未到,午後上證單日轉向,只跌4點,恒指又抽番上去,18000點又失而復得,成交減至1,500億元。

騰訊業績表面好,其實都係減開支下先做到預期,收入未有增加,況且遊戲版號又未有新增,呢個真係重點,只係北水keep住買,由低位280邊彈番上292元收。另一面美團就全日被壓住,企鵝一月先除淨,三月先派送。噚日北水淨流入43億元,買騰訊28億元,而沽美團就11億元。

而前日尾段炒上的遊戲股就無力為繼,早段仲跌得幾深吓。其中焦點係網易(9999)身上,遊戲商動視暴雪會係明年1月23日終止同網易合作,只會淨下「暗黑破壞神」一個項目,2021年同動力暴雪合作業務佔網易收入約低單位數,噚日股價跌咗10蚊,應該反映咗大部份流失嘅收入。而網易亦公布了9月底止,第三季盈利66.99億元人民幣,按年增長1.11倍,每股盈利2.05元。

阿里巴巴(9988)至9月底止第二季股東應佔虧損205.61億元人民幣,每股虧損0.97元;去年同期股東應佔盈利53.67億元。而按非通用會計準則計,盈利則為338.2億元,按年增長19%,每股盈利1.61元。巴巴美股ADR時段反彈上約83港元。

美國聯儲局官員又放鷹,可能見股市彈得幾勁,驚你哋有錢出去消費,嚇一嚇你哋,美股都挫一挫,曾跌逾1%,收市三大指數都差不多完全收復失地,係納指跌39點多少少。反而中概股指數逆市升近4%,帶動恒指夜期升300幾點,美股開市前曾跌200點,最新黑期做18300,升240點。

紐約期油跌4%到82美元,美匯彈一彈,上到106.68,英鎊1.186,歐元企得穩,人民幣仲係弱,美元兌人仔最新為7.15。