2022年11月30日

港股終於唞下氣,借上證一同回落和外圍局勢稍微緊張下,恒指低開後抽一抽就回軟,始終升咗3800點,10天線噚日先上到16850,現水平仲Head 住1400點,無論用時間或跌幅調整,都有一定空間。下星期又有世界盃,往年世界盃就例靜,睇下今年「芬佬」會唔會要追數所以唔睇波。尾市個市又拉番上去,死頂住18000點,收18287點,成交縮減至1700億元。

騰訊(700)業績前一度炒到上296元,跟個市落又跌到280元,尾市受人民網發文指遊戲產業鏈機不可失刺激,即扯上294元收,消息亦帶動一眾手遊股炒上。碧桂園(2007)批完第二日就即刻輪到雅居樂(3383),內房民企真係好等錢使,佢哋嘅債冇人信,一定要好高息,以往冇事內房債都10厘,發債成本太高了。最慘就係後者真係好趕時間好等錢用,先舊後新上板,8億銀都殺。內房物管板塊連升下出現調整,碧桂園險守配股價2.68,單日都要跌16%。雅居樂連批股價2.68都穿,低收2.5,其他水緊又未抽到水的都要跟跌十幾%。

騰訊宣布分派美團(3690)股份作為特別中期股息。持有每10股股份獲發1股美團B類普通股,待分派的美團股份涉及約9.58億股。

騰訊至9月底止第三季,股東應佔溢利399.43億元人民幣,按年增1.1%。每股基本盈利4.187元,勝預期。而非國際財務報告準則計,第三季盈利322.54億元,按年升1.58%,第三季增值服務業務收入下降3%至727億元,國際市場遊戲收入增長3%至117億元,本土市場遊戲收入則下降7%至312億元。

外圍股市暫時未有方向,可能都係處於升後調整,市場上開始擔心年底消費旺季銷情會未如理想,一眾零售股被拋售,道指下跌40點,納指跌174點,晶片股受壓,中概股指數跌4%,外圍恒指亦跟住跌200點至18100水平。

美債息回到3.7厘,美匯106.27,人仔上番7.10。商品價格下跌,紐約期油85美元,比特幣16500美元。