真係跌得愈深，彈得愈甘，港股平開後又抽，呢一下真係預計唔到，冇計，亦都唔敢跟追，只能跟自己策略做，唯一慶幸係貨底都有升，未至於齋睇。

恒指噚日高收18343，升723點，成交又2,000千億元，科技股又嚟過，巴巴（9988）嘅關連公司螞蟻集團旗下嘅螞蟻消費金融可以再增資，相信一定有國家首肯，市場憧憬國家對新經濟公司監管會鬆下，巴巴升11%，而騰訊（700）、美團（3690）都升10%，京東（9618）升8%。升勢都蔓延到其他股份，阿里健康（241）連爆兩日。今日開始會有騰訊、巴巴，同埋京東公佈第三季業績。

碧桂園（2007）配新股，係早段插一吓，收番上3.2，只跌6仙。呢隻係內房股開始反彈後第一隻抽水，如果一抽即死，咁其他等錢使嘅點算，所以一為神功，二為弟子，頭幾隻配股嘅內房應該都企得住，之後就唔敢講。碧服（6098）仲勁，月初仲喺7.5元左右，噚手日已去到19.4，兩日升5成。

其他板塊中，股神買TSM，晶片股跟升，中芯（981）升9%，車股入面比亞廸（1211）因股神要減持，升幅跟唔到大市，其他車股好似長城（2333）同吉利（175）都跑出，連最弱既小鵬（9698）相比低位都升咗4成。藥股第一批股份升，依家高位調整中，個市調，可能都會跟跌一下。而家就係搵吓有邊隻基本因素好嘅股份仲未升，或者係升得少，噚日見到一隻長飛光纖（6869），月頭出Q3業績後由16元開始跌，終於喺13元邊撞到250天線守到，噚日收上14.1，開始扭轉跌勢，呢隻股今個浪未升過，有得搏。

美股低位回升得多，係會好反覆，始終經濟仲喺分叉囗，噚晚波幅都600點，收市升56點，而納指就繼續追落後，升1.45%。美匯106.32，係俄羅斯導彈射中波蘭個刻波動大少少，其他貨幣變動不大。