上周五夜期同外圍恒指都係升200幾點，點知噚日期指一開5分鐘就衝上全日高位18200，而現貨就上到18011，除咗科技股高開外，內房有國策支持，一眾內房股炒上，部份最多升5成。人行同銀保監聯手刋發254號文件，包括6個項目、16個措施，主要係延長建設貸款期限，還款期延遲一年，仲有向發展商提供項目信託融資保交樓，為民企發債提供信用支持，預計銀行總支持額達萬億元人民幣。政策對內房無疑係久旱逢甘露，但都要睇公司本質係點，例如對恒大肯定冇用，其實對某些連息都比唔到嘅內房都係作用不大，除非內地樓市突然回暖，地產商有錢回籠，否則延長多久都冇用。好似碧桂園（2007）同佢隻物管碧服就好啲，未有話冇錢還息，所以個市回落時仲頂得住有3、4成升幅。

睇番個市，開得咁高就梗係要回，恒指今年三月低位18235，9月跌穿後10月反彈上18200就出現消耗性下跌，而家彈番上去18200已成為主要阻力，噚日喺高位開支大陰燭落，配合北水又流出40億，日線圖有兩個裂囗，唔多扎實。依家唯有係等佢反覆，50天線17227係第一個支持，最好喺區間橫行等十天線上嚟，估計調整最深可以去16800至17000點都唔影響反彈。

科技股高開低走，成2000億成交下市寛都好，成千隻股份上升，而升勢亦蔓延到其他股份，除咗上面講嘅內房外，阿爺呼籲大家儲定啲藥，特別係新冠相關，生科同藥股成個板塊向上，開拓（9939）、騰盛（2137）升3至4成，其實仲有落後嘅，好似心通咁（2160），噚日先行第一棍。早前講過嘅重型機械股如重氣（3808）同中聯重科（1157）噚日追落後再開車。睇嚟如果個市唔大回，升浪會繼續蔓延到其他股份。

中美大佬傾計，氣氛算良好，拜登繼續認同一個中國原則，而習主席則認同台灣是中國內政，並表示世界之大可容納中美雙互發展。

美匯106.8，英鎊1.17，人民幣7.05。美股先升後回，道指跌200點，納指跌1%，ADR中概股逆市企穩，紐約期油跌3%至85美元，而恒指夜期則企穩。