港股上周五大升1200點，成交1800億元，本來早上喺50天線有啲阻力，下午傳國內行5+3就一下抽穿，夜期上到17500樓上。不過留低一個成800點嘅上升裂口，唔夠實心慢慢升上嚟咁扎實，係擔心會回補部份裂囗，低位有貨仲可以坐住，要追就小心出後抽。中國疫情周末持續上升，星期日已去到14000人次，廣州最多，可能對中港股市有多少影響，況且北水上周五大升市中轉為淨流出11億元，淨係騰訊（700）同美團（3690）合共已流出10.5億元。

據港交所股權披露顯示，股神畢非德的投資旗艦巴郡在11月8日再於場內出售比亞迪（1211）578.25萬股H股，每股平均作價約196.99元，套現約11.39億元。減持後，巴郡於比亞迪持股量進一步降至約1.82億股或16.62%。

復星系繼續在市場套現，旗下復星醫藥（2196）公布其子公司復星實業今年3月14日至11月10日，通過二級市累計出售BioNTech 共計約109.49萬股普通股，出售後約佔0.2%。今次出售部分於前兩年已累計確認嘅公允價值變動收益約為16.5億元人民幣，今次出售的累計稅前收益約為9.6億元，所以對復星醫藥今年盈利綜合影響約損失6.9億元。

美國中期選舉中民主黨議席增至50席，但係由於民主黨籍身兼參議院議長的副總統賀錦麗可以投下關鍵一票，意味民主黨鎖定參議院控制權。密歇根大學11月美國消費者信心指數初值為54.7，市場預期為59.5，感恩節前消費信心下跌。

Crypto交易所FTX上周五宣佈破產，其他虛擬貨幣受壓，比特幣最多跌8%後企穩，周末波幅收窄，最新報16600美元。

美股上周五出現急升後反覆，道指收市持平，加息或緩和下，科技股開始追落後，納指再進帳1.8%。納指係十月中起做咗個小雙底，啱啱升穿咗勁線，如果條頸線11200守得住，可能仲有800至1000點上。

美十年債息回到3.8厘水平，早前講過美滙好大機會係114頂咗，結果十日內就由113跌到上周五的106.4，歐元升上1.03，美元兌日圓跌穿140，人民幣7.092。