港股低開後抽高，再倒跌，全日波幅近400點，收市跌38點，獎門人話齋打和。恒指於高位反覆，當然要整固一下，問題係以跌幅還是以時間整固，昨日看好似跌唔落咁。不過今個星期多點事情發生，好似美國兩會選舉，通脹數據，昨日又多樣變數，就係虛擬貨幣兩個大佬打交，FTX 交易所被揭同系公司陷財困而被沽售，幣安趙長鵬稱去年已完全沽出FTX股票，現在正減持其虛擬貨幣FTT，日中FTT急跌30%，以太幣跌12%，而比特幣都跌1,000美元，今次幣市小風暴未知對其他金融市場影響有幾大，始終現在都是一環扣一環嘅模式下，要多加留意。

講回港股，昨日幣市跌時，恒指落一落都即刻回升，暫時未受影響，起碼國內股市仲頂得住，上周急升後，今個星期仍在整固中，勢未轉，而家不會做淡，只有等回頭買。

美國今個星期通脹數據預期係8%，核心通脹6.5%，照計不會有太大驚喜，如果輕輕miss，估計未會令股市大跌，當然若大幅超預期就會有震盪。

晚上突然傳來幣安同FTX簽定無約束力收購協議，收購FTX美國以外的海外資產，今次可謂兵不厭詐，一日之內由建議沽出至收購，消息令比特幣和以太幣跌幅曾收窄至2%，其後又再大幅下滑，FTT最新跌7成，以太幣跌15%，比特幣現報18600美元，跌2,000美元，跌幅一成。

市場上預期若共和黨勝出參眾兩院，有機會利好科技板塊，而美元強勢或會終止。美股係選舉前夕雖然繼續升，但日內波幅大，升500點後全蒸發，又回升300幾點收市，標指納指更一度倒跌。

美匯進一步下跌至109.5，10年債息4.15厘，日圓回升上145.5，人民幣7.22。