前晚美國聯儲局於加息後的公佈又令市場失望，鮑威爾又放鷹，第一下話視乎市場情況而決定12月加幅，跟住又話最終息囗可能高過預期，市場都捉摸不到，升得多下又借勢落，又或者係市場過去兩星期過份FF，利率期貨50%顯示明年3月會去到5厘，現在唯有期望核心CPI增幅係未來幾個月盡快跌到5樓下。FED其實都仍擔心經濟衰退，所以前晚言論中都加入會密切留意收水對經濟影響字眼。鮑威爾幾個月前表明不會再預測利率走向，因為佢自己都係要睇數據，之前往往自打嘴巴。

昨日恒指下跌，較夜期仲跌得更多，外圍跌當然有影響，自身問題都幫不少。阿爺想搞混改2.0，首先國家市監局批准聯通（762）和騰訊（700）成立合營公司，持股比率為48同42%，仲要係聯通股權多過騰訊，跟住又傳中移動（941）會與茅台，市場最擔心獨角獸同民企國企化，ATMJ都跌4至6%。

前日仲炒緊話有reopened commitee，昨晚衛健委已表明清零政策不變，難怪阿爺經常稱別信外媒，結果體育用品，邊爐等一眾消費股應聲下挫。

講回指數，恒指升兩日後出回吐冇問題，但係落到10天線就有點危險，現在望周線破腳穿頭的確有難度，當然今日星期五，開番支陽燭上，穩住個勢，下星期可再諗。總之10天線得而復失後要小心，最後下面個小型頭肩底支持14900左右，穿埋就要離場，最後樂觀看，真係升得穿15900頸線，度上去就見17100。

接着前晚較鷹下跌勢，今晚又有大非農數據，美股最多下跌420點，納指跌200點，其後低位有承接，道指跌幅收窄146點，納指仲要跌180點，大型科技股捱沽，驚中國防疫措施影響生產，蘋果跌逾4%。

紐約期油88美元，美匯升1.3%，上到112.86，人民幣7.324。