2022年11月30日

昨日講過,眼見前日已有錢主動追大股,唯當時未能洞察先機,結果彈簧拉得太緊,港股昨日大報復,外圍升佢就跌,前晚美股跌,佢就反過來高開200點,上午最多升600,中午收市前升幅得番不足400,估唔到下午先係戲肉。午後有消息傳出中國會成立一個reopened  committee,研究明年三月開關的可能性,結果中港股市再抽多一下,上證收到2969,升76點,恒指最多升945。三點過後趙立堅又話未聽過有此委員會,恒指一下又回300點,結果收市都升768點,成交進一步增至1,500億元。大升下一定係科技股帶動,前日逆市仲有升幅的騰訊(700)同美團(3690)就係領頭羊,同升逾一成。

昨日恒指大棍上,北水淨流入74億元,10天線近收復,指數近兩個幾月來每次開一枝大陽燭後都玩陰落,要扭轉頹勢就要升穿15900。

憧憬內地開放傳聞,紐約期油升2%至88美元,美匯111.46,匯市變動不大,人民幣7.30。

靜待議息結果,美股反覆,納指相對較弱,跌0,9%。中概股係跟随港股時段升幅彈。而外圍恒指就跌90點。