2022年11月30日

上周五晚恒指黑期都升到200幾點,到正本戲又再嚇你一嚇,平開後即跌到14600水平先見有力反彈,午後最高丄到15113,上證冇力,人民幣又跌,美元對人民幣上到7.3,港股回軟,恒指收14687,跌176點,大波幅市下成交1,300億元。

大市反覆,指數成份股分兩極行,內地10月份製造業PMI指數49.2,跌落盛衰分界線下,預期係50,經濟收縮,消費股下跌,雖然係製造業指數,但企業生意差,最終都是影響消費。

內房不利消息陸續有來,先係龍湖(960),吳亞軍因私人理由辭任主席,市場驚一驚,早段最多跌4成,低見7.26,成個內房板塊一下子又散過,連中國海外(688)及華置(1109)都曾跌近9%,碧桂園違約評級被下調到BB–。另外國內有報導指深圳指示地方政府要停止隱性債,內房已冇錢買地,亦不能底押借錢,反映銀行可能冇水,內銀股都被拋售。中午龍湖出通告話會提前償還銀團貸款,希望穩住市場信心,結果重回上10元,都要跌24%。

個市未有大插,一度倒升,因為有科技股撐住,抽上一刻,一眾科技股的買盤真的很強,冇bid 住買,反見主動掃貨,係平淡倉定係追貨,冇人知,最後都係得騰訊(700)及美團(3690)有得升,不過現水平沽空比率係少左。騰訊係有消息,中午傳中信會買晒南非股東所有股份,股價一度抽上216元,最後只升2.4%。

美股連周急升後去到議息前,回吐都屬正常,科技股壓力大一點,納指跌1%。市場繼續擔心Meta於元宇宙過份擴張,導致虧損擴大,昨晚再跌6%。

議息前夕,大行都加入支持開始放緩加息行列,美匯重上111.5,歐元0.99,人民幣7.33。