2022年11月30日

外圍升,但A股回氣中,上證今次由低位反彈近160點,回一回冇問題,日中人民幣離岸價升到上7.24,人仔繼續跌,上證最好別跌穿10天線3036點。港股跟上證跌,見一見昨日高位就掉頭回落,配合埋施政報告宣讀時例跌的往績,指數愈跌愈多,昨日科技股帶頭落,消息欠奉,只見多隻科技股股被調低目標價,而普遍目標價都比現價仍高5成,大市要升,科技股拒行是沒用的。

恒指低收16511點,跌403點,星期二升幅完全蒸發有突,簡單睇,星期二低位16558最好別跌穿,昨日收市已穿,今明兩日上番去可能仲有救,否則扭轉個彈勢又要重頭來過,所以昨日話向下800點做好不值搏,一係跌近16000點,止蝕近,一係破17000點先入市,中間遊走最難做。

個股中,大型科技股跌3至5%不等,港交所(388)首三季純利跌28%,以港股今年成交咁少計,表現不太差。其他幾大板塊中,車股弱,幾大車股都跌,前幾日開始見到花旗有沽出比亞廸(1211)未知是否股神又再減持,夠比例要披露自有分曉。

美匯升上112.98,人民幣續軟,美元對人民幣升上7.2713,單日升400點子,日圓直逼150,近一個星期亞太區貨幣自己走弱,好似出了什麼事的模樣,加上美息抽上4.14厘,要小心。

俄烏戰火重燃,中概股指數ADR時段急跌7%,部份應與人仔走弱有關。Tesla第三季收市差少少,但每股盈利就好過預期,盤後曾跌6%。美股就反覆下跌,科技股表現較差。

美期今早企穩,恒指黑期再跌200點,至16300水平。