美國通脹玩謝全球股市，美期昨日係亞洲區時段「浸浸落」，中午時已跌了500點，日股同台股分別下跌3%和2%。阿爺一樣，上證又係午後見低位，收市已跌少一半，收3255點，跌29點，上面100天線（3278）頂住，藉外圍因素回落，上升軌未穿，先當調整睇。

港股低開600點後都係低位徘徊，跟上星期五不同，昨日全日都彈不起，科技股回吐，巴巴（9988）跌8%，勉強守得住100天線，其他大科網股中，騰訊（700）及京東（9618）仍於10天線上。車股早段都仲有得去，最後升幅都收窄。至於指數，恒指大跌700幾點，第一關支持21300一開市就沒了，20和50天線在20950附近，其實50天線最好守得住，但美股散多幾百一千點，都一定守不到，下兩個防守位要數應該在20800及20650，穿埋就不用看，又係20000點見。至於恒生國企指數同科指，都係睇住50天線，不宜失守。唯港股近日市寛係有改善，今次係被拖累下跌，等佢拗腰就可搏短線。

美國10債息進一步升上3.35厘，歐洲政府債券昨晚急跌，意大利10債息升上4厘，而VIX恐慌指數升上35，全球一齊避險，資金從高風險市場流走，虛擬貨幣市場首當其衝，比特幣上星期四、五都於30000美元邊，到昨晚已經跌到22500美元，幾日已經蒸發兩成半。美滙上到105.2，英磅跌逾1%，歐元去到1.04，日圓反而重回134，可能有避險資金撐住，而人民幣都落到6.7823。

有報導指聯儲局今周會考慮加75點子，美股最多跌千點，納指收市跌530點，差不多20個月低位，個股冇隻好睇，跨國企業盈利更受強美元衝擊。而外圍恒指再跌300點，落到20700水平。