美國5月份CPI按年升8.6%，創近40年新高，接着巴克萊出來話今個星期要加0.75厘，美債息升上3.16厘，美元又挾，美股當然散，市場對通脹見頂預期落空，應該說是遲一、兩個月才見頂（通脹不會長升），估計今個月加0.75厘機會不大，0.5厘拉長來加會較現實，但對炒家來講，長痛就更痛苦。另一邊廂，官員都可能意識到企業存貨正上升，人民儲蓄下降至金融海嘯後新低，股市跌，消費力正下降，6月份消費者信心指數跌到50.2，預期為58。又驚通脹，又驚落藥太重加快衰退，儲局都可能係Buy Time，壓倒通脹又希望減低衰退影響 ，已經有人指美國2025年前又會開始減息。

美股大跌880點，納指跌逾400點（3.5%），三大指數全日低位收市，仍未跌穿上月低位，但VIX恐慌指數一度升近30。Tesla計劃股份在8月一拆3，都要跌3%，其他如蘋果、META都冇隻好睇。紐約期油回到118.7美元。比特幣反覆跌穿5月低位，最新為27000水平，為近18個月低位。

美元升上104.3，歐元跌1%，去到1.0509，日圓低位徘徊，美元兌日圓報134.68，人民幣下跌400點子，最新為6.7426。

港股上周五都算好腰力，最多跌近400點，低見21487點，只是前阻力位213至21400真係有支持，車股同周邊相關股份急升，但收市後中國汽車工業協會就公布5月內地汽車銷量186.2萬輛，按年下降12.6%，按月則增57.6%，按月升主要都係3，4月疫情下國內車輛產銷都下跌。

大型平台股份靠穩，反見二、三線科技股繼續追落後。但美股累夜期又跌過，夜期跌370點，而黑期今早更大跌近600點，做21200（因美期又跌百幾二百點），又落到關鍵位，且看今次是否守得住。

短期市況還算不錯，始終巴巴（9988）仲有個發酵點，雖然中證監同螞蟻都出來否認彭博話螞蟻重新上市傳聞，但之後路透又講多一次，空穴來風也，短期造淡巴巴未必係上算。