2022年09月29日

美國的中概股預定除牌名單中又多加11隻,累計已達140隻,最終且看有幾多隻要退市。憂慮退市,中概股於美國一定跌價,個個爭相走避,若部份的返回香港上,跌得過殘,到時真係可以望多一眼。

美股跌,其他資產都開始跌,美金強,市場繼續避險,資金開始搵貨沽,好似比特幣,跌到落30,000美元,市場擔心可能出現流動性危機,開始拆倉,有隻Luna的穩定幣UST都跌穿位,低見0.6美元,隻幣都曾跌5成,有交易所暫停其交易同提存。另外恐慌指數VIX升到上34,但仲未見到有一下急抽,通常時機一到就會有機會見短底。

港股以接近全日最低位開出,承國內股市反彈,曾經彈到上19700水平,阿爺出囗術撐股市,A股反彈,人仔日間低見6.77,港股收市時上返6.73,恒指全日跌368點,成交增至1400億元。比亞廸(1211)長沙廠房懷疑泄漏有害氣體而要停產,低見203元,最後跌13.6,收215元。碧桂園(2007)有傳其褔建等地賬戶被凍結,跌8%,而碧服(6098)都跌一成。

10年債息回落到2.99厘,今日會有CPI數字公佈,對通脹是否見頂同未來兩個月加息幅度有啟示性作用,昨晚美股曾回升500點,但好快已經變成軟腳蟹,倒跌350點,收市跌84點,納指反彈逾百點。個市咁大波幅,仲未見到有恐慌性拋售情況出現,的確麻煩少少。

美滙103.95,人民幣6.7509,日圓橫行,英鎊同澳元持續走軟。紐約期油99美元,比特幣回穩,現報31000美元。