美國證交SEC又係預定除牌名單多加88隻股份，當中包括京東（9618）、拼多多、嗶哩（9626）等，還記得上星期五才傳出中美開始有對審計有共識，昨日又再出招，中美要和平共處，真難矣。雖然全部企業都話會合作力保在美上市地位，其實最終留在美國市的中概股，應該不會有好敏感資料，亦都不介意交出審計底稿，剩下來的不是回A，就是回H，港交所（388）早前已發表正研究南向交易以人民幣計價，相信都是為了迎接回H的中概股，並方便國內人買貨結算。

美國收水力度冇預期咁鷹，言論都相對中性，起碼大家現都預期6月都係只加半厘，估計儲局都係係抗通脹同防衰退之間遊走。美股大反彈，國內A股復市都升，港股都真係令人失望，高開後最多升400點，高見21284，就係過不到昨日提過的21300最低要求，收市仲要倒跌76點。

話港股冇力，正面一點不如話形容為有前瞻性更好，好似知道美股會一彈即散，中概股又變了爛雞蛋，愈來愈多公司被納入實體清單，如果好似滴滴兩頭不到岸就麻煩，真係化整為零，有沽壓都屬正常，跌得最多係「蔚、小、理」三大電動車，加埋拼多多同愛奇藝，全部跌一成以上。

10年債息升穿3厘，美股係驚衰退又驚加息收水，加埋電商股業績吾好，前晚非理性咁反彈太多，昨晚即還，道指跌過千點，納指都要散600點，英倫銀行警告存在衰退風險，比特幣都跌至36500美元。

美滙回一日即刻又升過，今早報103.58，英鎊同歐元即跌，英磅跌到1.2361，歐元險守1.05，日圓130.24，人民幣進入一步下試6.7，現報6.6916。

外圍黑期預示港股今早低開逾500點。