2022年09月28日

本來普京只係聲稱到烏東維和,但無見好就收,繼續向基輔施壓,企圖推翻烏克蘭現有政權,以防他日該政府再投奔北約,至於出動核震懾,本來就屬於核武的功能,大家本來從沒想過按掣,只係話俾你聽:「你嚟吖,你嚟我就撳掣!」當然只要一方唔克制,就會出事,普京其實同特朗普一樣唔按常理出牌,就係要你估佢唔到,令對方覺得佢唔克制,至於同烏克蘭政府談判,核震懾係談判前,爭取談判籌碼,說明比大家聽會隨時準備核武,只希望烏克蘭政府背後的歐美支持者投鼠忌器,叫澤連斯基讓步。談判係博弈,整盤棋並非普京一個人話事,事件後續會怎樣,連局內人都未必知道,按常理推測,談判第一次都係冇結果多,因為談判通常都係開天殺價,往後慢慢落地還錢,大家都在摸底階段,摸普京的底線,普京就好肯定唔俾人摸,一定表現強硬,唯有希望佢見好就收。

一個核字令港股一度見近兩年新低,見22406點,收市重上22700水平,恒指觸摸到22500點支持後反彈,預期有機會出反彈,好似美團(3690)低位行了幾日,冇穿到底,而騰訊(700)亦跌近250周線,好多股票似到了位,技術上係可以出反彈,只係外圍政局難估。

信義系公佈對績,信義玻璃(00868)至去年底止全年盈利115.56億元,按年升79.94%;每股盈利287仙,派末期息每股76仙。而信義光能(00968)股東應佔溢利49.24億元,按年增長7.97%,每股盈利55.65仙,派末期息10仙。期內,收益160.65億元,按年增長30.44%

美股現貨時段跌幅不斷收窄,最多跌600點,收市跌166點,納指逆市上升56點。俄烏首次談判後,同意再商,未致於破裂,金融制裁下金融股下跌,軍工股上揚,電車股升,Tesla7%,理想升9%。俄股昨停市一天,而在其他地方掛牌的俄股都被大幅洗倉。

比特幣特抽高一成至43000美元水平,加密貨幣市場近期比股市走得更前,紐約期油96美元。美10年債息回到1.84厘,美滙96.75,英鎊1.3421,日圓115.07