上星期五港股看似都係悶局收場，點知下午阿爺一句說話，個市就散了，發改委指外賣等互聯網平台應進一步下調餐飲業服務費，美團（3690）即刻大插，個半小時內跌了30元，低收188元，其他平台股份都被拖累，跌幅係2-3％之間；北水淨走32億元，主要係美團及企鵝仔為主。

於美股時段，中資股ADR都繼續弱，巴巴（9988）跌到116港元，騰訊（700）461元，較上周五香港收市低9元，所以外圍恒指今早已跌到24000水平，較上周五收市再低300點。個市係人為因素落番去，再度跌穿100天線，港股今個星期開始會進入業績期，而家睇番今年恒指兩個低位連接起來的上升支持會否守得住，現正處於24000水平。

最想俄烏開火一定係美國佬，就算話有得傾，佢就話實打，拜登中期選舉前已無計可施，如果俄羅斯入侵烏克蘭，可名正言順率領西方制裁俄羅斯，資金會由歐洲流去美元資產，仲可以食埋俄羅斯輸往西方的天然氣份額。美股係老美不斷吹奏下繼續偏軟，納指跌170點，幅度較大，

商品價格中，紐約期油回落至92.83美元，比特幣跌穿40000萬美元，周末進一步下跌38000美元水平。美十年債息回到1.93厘，美滙96.14，英鎊1.36，日圓114.89，人民幣6.3260。